Maandag word die
werk voortgesit in camarata se badkamer en voorbereiding vir nuwejaarsvieringe
getref. Petrus, Peet, Steve en sy seun is vroeg weg gholfbaan toe waar hulle
goed nat reën. Verder besluit die regering om Donderdag en Vrydag ook as
openbare vakansiedae te verklaar wat nie baie help met die werkspas by die
camarata se badkamer nie.
Dinsdag op die oujaar
begin die vieringe met ’n middagslapie vir ons en die kinders. Vroegaand se
vieringe vir die kinders om hulle besig te hou is kreaktiwiteit goed soos
kralletjies in ryg, goed versier, vliegtuigies vou, strooitjies in die hare
steek en so meer. Later na almal moeg is, word vir hulle fliek gewys en op worsbroodjies
en koeldrank getrakteer. Die worsbroodjies was ons drie se werk en Peet het 250
stukke wors op die vuur gebraai. Half 12
sit Petrus, Peet en 3 ander af sokkerveld toe om vir die vuurwerke voor te
berei. Dit gaan maar so sukkel – sukkel om die vuurwerke af gevuur te kry, met
’n lastige windjie wat die vlam gereeld dood waai, maar daar word ’n hele
klompie afgevuur. Vuurwerke is net vir ’n uur wettig om die nuwe jaar te vier. So
1 uur begin ons alles oral waar ons was opruim en skoonmaak om die bed so teen
2uur te vind (tot 11 uur die oggend). Vella moes ook afgelaai word en dis toe
dat ons een van die groot seuns van die camarata buite die sentrum sien. Terug
by die sentrum gaan ons toe eers kyk of hy terug is, om te vind dat hy reeds
uit is teen 4 uur die middag en nog nie terug was nie.
Hy daag toe eers
die Woensdagoggend half sewe by die sentrum op en ons moes toe op die eerste
dag van die jaar straf uitdeel. Hy word gehok vir ’n maand en moet skriftelike
toestemming kry om vir skoolgoed uit te mag gaan, sy foto is ook vir die
sekuriteitswagte by die hek opgeplak.
Die dag is
redelik stil, die teëlers het die dag afgevat en die personeel was ook af.
Gelukkig werk hulle toe Vrydag. Petrus en Peet sit die waaiers, wat geskenk is,
in die kamers op en word getrakteer op ’n middagete in ’n straat-restaurant.
Hulle kry varktjops en wors (op ’n vuur gebraai), pap, tamatie en uie, dit was
nogal ‘n heerlike ete.
Saterdagoggend
val ons in die pad Jay’s Beach Lodge op Macaneta Eiland toe om vir 3 nagte te gaan
kamp. Die verkeer is besonder besig en ons sien baie SA mense wat terugkeer
huis toe. By die veerboot is ons so na ‘n halfuur op en oor die rivier. Aan die
anderkant het daar so ’n tou van ’n kilometer gestaan van meestal SA mense wat
oppad terug huis toe was en ons verneem ook later dat die boot na ons oor is
weer gebreek het en vir 2 ure gestaan het. Wat beteken het dat die
terugkerendes lank moes wag om oor die rivier te kom. By Jay’s Beach Lodge
aangekom boek ons in, gaan parkeer die Kia onder ’n boom by ons kampplek en
gaan swem eers in die see, aangesien dit baie warm, met ’n hoë humiditeit is.
Oppad terug stop ons by die restuarant vir koeldranke, waar ons die eienaares
(Elna) raakloop. By die kampplek aangekom, terwyl ons nog besluit waar ons die
tente wil opslaan, stop die eienaares by ons en nooi ons om gou saam met haar
te ry. Sy vat ons na een van die chalets toe en bied dit vir ons aan om in te
bly sonder enige bykomende koste, haar verklaring is dat Alta te moeg lyk om in
’n tent te slaap. Deur Elna se goedhartigheid hou ons vir 3 nagte gemaklik vakansie
by die see. Dankie Elna en ook dank aan ons hemelse Vader vir die seëninge.
 |
| Oujaarsaand |
 |
| Jay's Beach se chalet |
 |
| See is reguit met hierdie paadjie oor die duin |
Geen opmerkings nie:
Plaas 'n opmerking